XXXI

Īsdem fermē diēbus īsdem causīs Germānicae legiōnēs turbātae, quantō plūrēs^[1], tantō violentius, et magnā spē^[2] fore ut Germānicus Caesar imperium alterīus^[3] patī nequīret daretque sē legiōnibus vī suā cūncta tractūrīs. duo apud rīpam Rhēnī exercitūs erant: cui nōmen superiōrī^[4], sub C. Sīliō lēgātō, īnferiōrem A. Caecīna cūrābat. rĕgĭmen summae reī pĕnĕs^[5] Germānicum, agendō Galliārum cēnsuī^[6] tum intentum. sed quibus Sīlius moderābātur^[7], mente ambiguā fortūnam sēditiōnis aliēnae^[8] speculābantur: īnferiōris exercitūs mīles in rabiem prōlāpsus est, ortō ab ūnetvīcēnsimānīs quīntānīsque initiō, et trāctīs prīmā quoque ac vīcēnsimā legiōnibus: nam īsdem aestīvīs^[9] in fīnibus Ūbiōrum habēbantur per ōtium aut levia mūnia. igitur audītō fīne Augustī vernācula^[10] multitūdō, nūper āctō in urbe dīlēctū, lāscīviae suēta, labōrum intolerāns, implēre cēterōrum rudēs animōs: vēnisse tempus quō veterānī mātūram missiōnem, iuvenēs largiōra stīpendia, cūnctī modum miseriārum exposcerent saevitiamque centuriōnum ulcīscerentur. nōn ūnus haec^[11], ut Pannonicās inter legiōnēs Percennius, nec apud trepidās mīlitum aurēs, aliōs validiōrēs exercitūs respicientium, sed multa sēditiōnis ōra vōcēsque: suā in manū sĭtam rem Rōmānam, suīs victōriīs augērī rem pūblicam, in suum cognōmentum adscīscī imperātōrēs.

Recitātiō

Recitātiō tarda ad faciliōrem perceptiōnem apta.

Adnotātiōnēs

↑ Germānicae legiōnes octō fuērunt.
↑ ablātīvus causae.
↑ = Tiberiī.
↑ ea legiō, quae “superior” appellābātur, sub Sīliō erat. (sī aliquis Gaius appellātur, id dīversīs modīs dīcī potest: 1: “nōmen alicui est Gāius.” 2: “nōmen alicuius est Gāī.” 3: “nōmen alicui est Gāiō.”)
↑ = apud.
↑ cēnsum agere: tribūta impōnere vel colligere.
↑ moderor -ātus sum dep. 1 alicui [reī]: coercēre, cohibere, restringere aliquem vel aliquod.
↑ ea sēditiō, quae apud īnferiōrem Germanicum exercitum orta erat.
↑ castrīs aestīvīs.
↑ vernācula: sīc appellāta, quia plērīque tīrōnēs lībertī vel servī fuerant, quī lībertātem et cīvitātem adeptī essent, cum in legiōnem cōnscrīberentur.
↑ nōn ūnus haec dīcēbat.

[1] Germānicae legiōnes octō fuērunt.

[2] ātīvus causae.

[3] = Tiberiī.

[4] ō, quae “superior” appellābātur, sub Sīliō erat. (sī aliquis Gaius appellātur, id dīversīs modīs dīcī potest: 1: “nōmen alicui est Gāius.” 2: “nōmen alicuius est Gāī.” 3: “nōmen alicui est Gāiō.”)

[5] = apud.

[6] cēnsum agere: tribūta impōnere vel colligere.

[7] moderor -ātus sum dep. 1 alicui [reī]: coercēre, cohibere, restringere aliquem vel aliquod.

[8] sēditiō, quae apud īnferiōrem Germanicum exercitum orta erat.

[9] castrīs aestīvīs.

[10] vernācula: sīc appellāta, quia plērīque tīrōnēs lībertī vel servī fuerant, quī lībertātem et cīvitātem adeptī essent, cum in legiōnem cōnscrīberentur.

[11] ōn ūnus haec dīcēbat.

[1]

[2]

[3]

[4]

[5]

[6]

[7]

[8]

[9]

[10]

[11]